शेवगाव
तू टाकलेला उकिरडा आणि सरपण उचलून घे म्हणत झाल्याचा धक्कादायक प्रकार अहमदनगर जिल्ह्यातील शेवगाव तालुक्यातील सुळे पिंपळगाव येथे समोर आला असून दलित कुटुंबीयांवर हल्ला करून लहान मुलांची ओढाताण केल्याच्या आरोपावरून गावातील ११ जणांविरोधात अनुसूचित जाती- जमाती प्रतिबंधक कायदा (एट्रोसिटी) व पोक्सो कायद्यान्वये गुन्हा दाखल करण्यात आला आहे. मात्र घटना घडवून दोन दिवस झाले तरी एकही आरोपी अजून अटकेत नाही.याबाबत पिडीत कुटुंबातील (रा. सुळे पिंपळगाव) एकाने फिर्याद दिली आहे. यात म्हटले आहे की, आपण गावातील गावठाणात असणारी सरकारी शेतजमीन वडिलोपार्जित कसत असून, शेजारील गटनंबर असलेल्या व्यक्तींनी मला तू टाकलेला उकिरडा व सरपण उचलून घे असे म्हणाले, या कारणावरून झालेल्या वादातून मला व माझ्या कुटुंबातील सदस्यांना जातीयवाचक शिवीगाळ करून मारहाण केली,असे फिर्यादीत म्हटले आहे. याप्रकरणी पोलिसांनी भास्कर रावसाहेब मासाळ, आजिनाथ रावसाहेब मासाळ, प्रकाश रावसाहेब मासाळ गंगाधर रावसाहेब मासाळ, गणेश अभिमान मासाळ, रमेश मोतीराम माने, प्रताप रोहिदास मासाळ, महेश अभिमान मासाळ, भाऊसाहेब मारुती मासाळ , संदीप किसन मासाळ, नानासाहेब देवराम माळी यांच्या विरुध्द शेवगाव पोलीस ठाण्यात गुन्हा रजिस्टर नंबर ७१२/२३ भादवी कलम ३५४ (अ) १४३,१४७,१४८,१४९,३२३,५०४,५०६ अनुसूचित जाती जमाती प्रतिबंधक कायदा तसेच बाल लैंगिक अत्याचार (पोक्सो) कलमानुसार गून्हा दाखल केलाय. सर्व आरोपी फरार असून पोलीस आरोपींचा शोध घेत आहे. दरम्यान गुन्ह्याचा अधिक तपास शेवगावचे पोलीस उपाधीक्षक सुनील पाटील हे करीत आहे. दरम्यान, सदर दलित कुटुंबीयांना संरक्षण द्यावे, संबंधित घटनेची समाजकल्याण खात्याने दखल घ्यावी, या कुटुंबीयांवर दाखल केलेल्या तक्रारीची चौकशी होऊन तक्रार दाखल करणाऱ्यांवर गुन्हा दाखल करावा, अशा अनेक मागण्यांसाठी तीव्र स्वरूपाचे आंदोलन करण्यात येणार असल्याचे पँथर रिपब्लिकन पार्टीचे राज्य संघटक व माजी जि.प. सदस्य पवनकुमार साळवे यांनी सांगितले.
