तीव्र पाणीटंचाईमुळे संतप्त नागरिकांचा इशारा – जलजीवन योजनेच्या दिरंगाईला जबाबदार कोण?
मुकिंदपूरसह आठ गावांतील 30 हजार लोकसंख्येचा पाण्यासाठी संघर्ष; ठेकेदार आणि प्रशासनाच्या उदासीनतेमुळे संतापाची लाट
नेवासे तालुक्यातील मुकिंदपूर (नेवासेफाटा) परिसरात भीषण पाणीटंचाईमुळे नागरिकांमध्ये तीव्र संताप पसरला आहे. जलजीवन मिशन अंतर्गत सुरू असलेल्या प्रादेशिक पाणीपुरवठा योजनेचे काम संथ गतीने सुरू असल्यामुळे सुमारे 30 हजार नागरिक शुद्ध पाण्यापासून अद्यापही वंचित आहेत.
उन्हाळ्यात वाढत्या तापमानामुळे टँकरने पाणीपुरवठा करण्याची वेळ आली आहे. काही गावांमध्ये नागरिकांना 2-3 किलोमीटर अंतरावरून पाणी आणावे लागत आहे. मुकिंदपूरसह भानसहिवरा, हंडी-निमगाव, सुरेशनगर, उस्थळ दुमाला, बाभुळवेढे, कारेगाव आणि रांजणगाव या आठ गावांमध्ये पाणीटंचाईने हाहाकार माजला आहे.
कोट्यवधींचा निधी आणि अपूर्ण कामाचा सवाल
महाराष्ट्र जीवन प्राधिकरणाने 30 कोटी रुपयांचा निधी मंजूर करूनही जलजीवन योजनेचे काम नियोजित वेळेत पूर्ण न झाल्याने संतप्त ग्रामस्थांनी प्रशासन आणि ठेकेदारावर रोष व्यक्त केला आहे.
योजना 13 ऑक्टोबर 2022 रोजी सुरू होऊन 29 एप्रिल 2024 पर्यंत पूर्ण होणे अपेक्षित होते. मात्र, मुदतवाढ मिळूनही अद्याप काम अपूर्ण आहे. त्यातच ठेकेदाराच्या कामगिरीवर कोणतीही कारवाई झालेली नसल्याने ग्रामस्थांमध्ये नाराजीचा कडेलोट झाला आहे.
नागरिकांची पाण्यासाठी धावपळ
- रांजणगाव येथील ग्रामस्थांना दोन किलोमीटर अंतरावरून पाणी आणावे लागत आहे.
- अनेक ठिकाणी बैलगाडी, रिक्षा, टेम्पो, दुचाकी यांच्या मदतीने पाणी वाहून नेण्याची वेळ आली आहे.
- सार्वजनिक विहिरी आणि हॅंडपंप कोरडे पडल्याने ग्रामस्थांना खासगी टँकरद्वारे महागड्या दराने पाणी खरेदी करावे लागत आहे.
"आम्हाला आणखी किती काळ पाण्यासाठी भटकावे लागणार?"
एका ग्रामस्थाने संताप व्यक्त करत म्हटले, "आम्ही घरातील बाया-मुले उन्हातान्हात 2-3 किलोमीटर पायपीट करत पाणी आणतो. हे किती काळ चालणार? शासनाला जर आम्ही मरावे असेच वाटत असेल तर तसे सांगावे. आता आम्ही गप्प बसणार नाही!"
ग्रामस्थांचा प्रशासनाला ठाम इशारा
ग्रामस्थांनी जलजीवन योजनेच्या कामाची गती तत्काळ वाढवावी, अन्यथा मोठे जनआंदोलन उभारण्याचा इशारा दिला आहे. "आता प्रशासनाच्या निष्क्रियतेला आणि ठेकेदाराच्या हलगर्जीपणाला उत्तर देण्यासाठी आम्ही संघर्षाशिवाय पर्याय ठेवणार नाही!" असा इशारा ग्रामस्थांनी दिला आहे.
पाणीपुरवठा सुरळीत न झाल्यास तीव्र आंदोलन
"आमच्या हक्काच्या पाण्यासाठी आम्ही रस्त्यावर उतरण्यास मागेपुढे पाहणार नाही," असा इशारा ग्रामस्थांनी दिला असून प्रशासनाने तातडीने उपाययोजना करावी, अन्यथा याचा भडका उडण्याची शक्यता नाकारता येत नाही.
